Vuelta : Pogacar veste u rossu à Monaco, nove centesimi di vantagiu !
Da Clara Marchini, in cullaburazione cù Media365
Tadej Pogacar hà fattu a so entrata in a Vuelta 2026 incù una vittoria di prestigiu in u cronometru inaugurale di Monaco. U slovenu, chì ùn avia mai purtatu u maillot rossu di capu di a corsa spagnola, hà battutu di nove centesimi u britannicu Ethan Hayter. Un successu simbolicu per quellu chì hè u favoritu assolutu di 'ssa edizione.
Dopu avè vestitu u ghjallu di u Tour de France per 71 ghjorni è u rosa di u Giro per 20, Pogacar hà finalmente scupertu u rossu di a Vuelta. À quasi 28 anni, u slovenu face u so ritornu nant'à a corsa spagnola, sette anni dopu a so terza piazza di a prima participazione. U quintuple vincitore di u Tour hè u capu di fila di 'ssa edizione, chì si lanciava 'ssu sabbatu in e strade di Monaco, induve ellu stà.
In 'sse strade ch'ellu cunnosce da capu à fondu, « Pogi » hà trionfatu in u cronometru individuale di 9,4 chilometri. S'hè impunitu per solu nove centesimi annantu à u campione di Gran Bretagna, Ethan Hayter, chì era scunfittu annantu à u so sediu di capu quandu Pogacar hà tagliatu a linea. U slovenu avia u vantaghju di parte in penultima pusizione, ghjustu nanzu à Primoz Roglic (24esimu), è cunniscia dunque u tempu da batte.
Tarling, in nome di u fratellu
Pogacar hà superatu trè britannichi in 'ssu cronometru : Hayter, ma dinù Joshua Tarling è Callum Thornley, di quattru è cinque seconde. Ottu ghjorni dopu a morte di u so ghjovanu fratellu in u Tour di Portugallu, Tarling vulia esse à u partire, ma 'ssu supplementu d'ànima ùn hè micca bastatu per vince. Piglia però u maillot biancu. Dui francesi, micca necessariamente aspittati cusì in altu, finiscenu in u Top 10 : Christophe Laporte è Léo Bisiaux. Invece, u specialista di a disciplina, Bruno Armirail, hà duvutu cambià di bicicletta è hà persu ogni chance di vittoria (147esimu).
L'outsiders fora di u Top 50
Sì Pogacar hè u grande favoritu di 'ssa Vuelta, parechji sò i candidati à u podiu, è ùn anu micca brillatu : Enric Mas hè 50esimu, Richard Carapaz 52esimu, Felix Gall 91esimu è Oscar Onley 106esimu. Ma i scarti sò ancu luntanu da esse fatti, è ferma 20 tappe. A cumincià da quella di dumenica, trà Monaco è Manosque, incù duie culline di 2a categuria in menu. Tadej Pogacar si tinerà à u so maillot rossu ? Micca sicuru...
Classifica di a 1a tappa (Monaco-Monaco, 9,4 km, cronometru individuale)
- Tadej Pogacar (SLO/UAE Emirates XRG) in 10'57''14
- Ethan Hayter (GBR/Soudal Quick-Step) à 0''09
- Joshua Tarling (GBR/Netcompany Ineos) à 4''
- Callum Thornley (GBR/Red Bull - Bora - Hansgrohe) à 5''
- Christophe Laporte (FRA/Visma - Lease a Bike) à 6''
- Léo Bisiaux (FRA/Decathlon CMA CGM Team) à 8''
- Oscar Chamberlain (GBR/Decathlon CMA CGM) à 9''
- Wout Van Aert (BEL/Visma-Lease a Bike) à 9''
- Finn Fisher-Black (NZL/Red Bull - Bora - Hansgrohe) à 10''
- Arthur Kluckers (LUX/Tudor) à 11''
Da a nostra redazione, incù a cullaburazione di Media365. Photo : Orange Sports